راولپنڈی: پاک فوج کے سربراہ جنرل قمر جاوید باجوہ نے کہا ہے کہ دفاعی بجٹ میں سالانہ اضافہ نہ لینے کا فیصلہ قوم پر احسان نہیں ہے۔
پاک فوج کے شعبہ تعلقات عامہ (آئی ایس پی آر) کے مطابق انہوں نے کہا کہ بجٹ کٹوتی سپاہیوں کے معیار زندگی پر اثرانداذ نہیں ہو گی، اسے خطرات کے خلاف دفاعی صلاحیت پر اثرانداذ نہیں ہو نے دیں گے۔
آرمی چیف نے مزید کہا کہ تنخواہ میں اضافہ نہ لینے کا فیصلہ بھی صرف آفیسرز کا ہے۔ جوانوں پر اس کا اطلاق نہیں ہو گا۔
انہوں نے اس عزم کا اظہار کیا کہ بجٹ کٹوتی کو دفاعی صلاحیت اور جوانوں کے معیار زندگی پر اثرانداذ کیے بغیر آنے والے مالی سال میں دیگر امور میں ایڈجسٹمنٹ سے پورا کیا جائے گا۔
آئی ایس پی آر کے مطابق جنرل قمر جاوید باجوہ نے عید لائن آف کنٹرول پر فوجی جوانوں کے ساتھ عید گزاری، انہوں نے ایل او سی پر فرنٹ لائن پر مامور جوانوں کے ساتھ عید کی نماز پڑھی۔
اس موقع پر امن، قومی سلامتی اور استحکام پاکستان کے لیے خصوصی دعائيں کی گئیں۔
پاک فوج کے سربراہ نے جوانوں سے خطاب کرتے ہوئے کہا کہ سپاھی کی عید اس کا یہ فخر ھے کہ وہ یوم تہوار پہ بھی اپنے خاندان سے دور دفاع وطن کے مقدس فریضہ ميں مصروف ھے۔
انہوں نے کہا کہ وطن کے محافظوں کا پہلا خاندان پاکستانی قوم ہے اور پیچھے گھروں میں موجود فیملی بعد میں آتی ہے۔
دفاعی بجٹ میں کٹوتی پر ان کا کہنا تھا کہ ہم ایک ہیں اور یہ اقدام ہر قسم کے حالات میں یکجہتی کے عزم کا اعادہ ہے۔
کمانڈر راولپنڈی کور لیفٹیننٹ جزل بلال اکبر بھی آرمی چیف کے ہمراہ تھے۔
