چیف جسٹس آف پاکستان جسٹس سعید کھوسہ نے مجرم غلام عباس کی سزائے موت پر عمل درآمد روک دیا۔
سپریم کورٹ میں جسٹس پراجیکٹ پاکستان کی جانب سے دائر کی جانے والی درخواست کے بعد سپریم کورٹ نے آج سزا پر عمل درآمد کے خلاف حکم امتناعی جاری کیا۔
اڈیالہ جیل حکام نے بھی تصدیق کی ہے کہ غلام عباس کی پھانسی کی سزا پر عمل درآمد کے خلاف انہیں سپریم کورٹ کا حکم نامہ موصول ہوچکا ہے۔
حکام نے بتایا کہ حکم نامے کے بعد بھانسی کی سزا پر عمل درآمد روک دیا گیا ہے۔
خیال رہے کہ غلام عباس 2004 سے قید ہیں اور انہیں 2006 میں اپنے ہمسائے کے قتل کے جرم میں مقامی عدات نے موت کی سزا سنائی تھی۔
غلام عباس کی والدہ نور جہاں کی طرف سے عدالت عظمیٰ میں دائر کی گئی درخواست میں مؤقف اختیار کیا گیا تھا کہ ان کا بیٹا ذہنی مریض ہے اور اس کی سزا کو مؤخر کیا جائے اور ایک میڈیکل بورڈ تشکیل دیا جائے تو ان کی بیماری کا تعین کرے۔
