شگر: وفاقی وزیر علی امین گنڈاپور نے پاکستان مسلم لیگ نواز کی نائب صدر مریم نواز پر ذاتی حملے کرتے ہوئے کہا ہے کہ مریم نواز نے عوام کے ٹیکس کے پیسے کا غلط استعمال کیا۔ عوام کا پیسہ اپنے میک اپ پرلُٹا دیا۔
گلگت بلتستان کے ضلع شگر میں انتخابی جلسے خطاب کرتے ہوئے انہوں نے الزام عائد کیا کہ مریم نے نواز شریف کے دو حکومتوں میں ٹیکس کے پیسوں سے خود کو خوبصورت بنانے کیلئے کروڑوں روپے کی سرجریاں کرائیں۔
مزید پڑھیں: میں اور بلاول بھٹو بچے نہیں ہیں، مریم نواز
دوسری جانب وفاقی وزیر ریلوے شیخ رشید احمد نے کہا ہے کہ مریم نواز سیاست کو بند گلی کی طرف لے کر جا رہی ہیں۔
وفاقی وزیر ریلوے شیخ رشید احمد نے کراچی میں میڈیا سی گفتگو کرتے ہوئے کہا کہ بلاول بھٹو زرداری نے کل کہہ دیا فوج کو نشانے بنانے سے متعلق کوئی بات نہیں ہوئی۔ بلاول بھٹو نے اپنے انٹرویو میں ذمہ دارانہ رویہ اختیار کیا اور بلاول بھٹو کا بیان حقیقت پر مبنی ہے۔
انہوں نے کہا کہ مسلم لیگ ن کی نائب صدر مریم نواز سیاست کو بند گلی کی طرف لے کر جا رہی ہیں۔ وزیر اعظم عمران خان نے کہا این آر او کے علاوہ ہر چیز پر بات ہوسکتی ہے جبکہ عمران خان پانچ سال پورے کریں گے۔
شیخ رشید نے کہا کہ جوڈو کراٹے کا نتیجہ خلاف توقع ہو گا تاہم سیاستدان مل بیٹھ کر فیصلہ کریں تو نتیجہ اچھا ہوتا ہے۔ 30 دسمبر سے 20 فروری تک پیپلز پارٹی مسلم لیگ ن کے ساتھ نہیں چلے گی۔
انہوں نے کہا کہ گلگت بلتستان میں تمام سیاسی جماعتیں انتخابات میں بھرپور حصہ لے رہی ہیں تاہم دیکھتے ہیں کہ ہارنے والے ہار کو تسلیم کریں گے یا نہیں۔
